دورك كمهندس مساحة شنو، أو بتعمل شنو؟
دورك كمهندس مساحة شنو، أو بتعمل شنو؟
بقلم م / أنس أحمدية ….. باللهجة السودانية
السؤال البسمعو دايما لمن يسألوني عن مجالي واقول مهندس مساحة، والإجابة طبعا بتكون على حسب السائل، وزي ما لكل مقام مقال، فكمان لكل سائل جواب، سبب المنشور هو إلهام من Rana Mustafa لمن سألتني عن طبيعة شغلنا ودورنا كمهندسين مساحة، فحابي الاجابة تكون للكل، عسى إنها تفيد من يسأل عن طبيعة شغلنا:
كـ مهندسين مساحة، دورنا أساسي في تحديد المواقع والمساحات بدقة شديدة ونحن اصلا بنعمل حاجتين (توقيع ورفع مساحي)، فمثلاً لما الناس تكون عايزة تبني بيت جديد، نحن بنكون المسؤولين عن تحديد أركان البيت وحدوده، عشان المباني تطلع في مكانها الصحيح وما يحصل مشاكل بعدين في التداخل مع الأراضي التانية.
ما بس كده، كمان نحن بنحدد الارتفاعات والانحدارات في الأرض عشان يكون البناء متوازن وما يحصل مشاكل في الصرف أو الميول.
وعملنا ما محدود بالبناء بس، كمان بنساعد في شغل الطرق، الكباري، الشبكات المائية وحتى المشاريع الزراعية وعندنا تخصصات داخل المساحة دخلت في علوم الفضاء والمجالات الطبية. وفي مجالنا الحقلي بنتعامل مع أجهزة دقيقة زي الـ GPS و التوتال ستيشن والميزان والتقنيات الحديثة زي الليزر إسكان، والموبايل مابينج وكمان الدرونز، ودائما بهمنا إن كل حاجة تكون مضبوطة 100% وبدقة عالية.
‼️ ما أنسى كمان الجانب المكتبي!
بالإضافة لشغلنا الميداني، عندنا دور مهم وتخصص مكتبي كمان. بنستخدم فيه برامج متقدمة في التحليل والرسم الهندسي زي الـ AutoCAD والـ GIS عشان نجهز الخرائط ونحلل البيانات اللي جمعناها من الموقع. مثلاً، بعد ما نخلص تحديد حدود قطعة أرض في الميدان، بنرجع المكتب ونبدأ في رسم الخرائط بتفاصيلها الدقيقة، ونتأكد إن كل القياسات مضبوطة عشان تكون جاهزة للتقديم للجهات الرسمية أو لاستخدامها في التصميمات الهندسية.
وعندنا كمان مشاركات مهمة كمهندسين مساحة في المجالات البحرية كمثال مبسط تحديد الحدود البحرية ورصد الحياة المائية وغيرها، وعندنا كمان دور مهم شديد في المجال العسكري، وفي بعض الدول بتخلي الهيئات المساحية العامة تابعة بشكل مباشر لوزارة الدفاع او المكاتب الامنية لحساسية وأهمية الهيئات المساحية.
وقائمة التطبيقات الهندسية وانواع الاجهزة المساحية المستخدمة في مجالنا وكذلك التطبيقات الحياتية اللي بتدخل فيها هندسة المساحة تطول ونكتفي بالمذكور اعلاه.
أتمنى الاجابة تكون بسيطة ومفيدة بالقدر اللي بخلي الجميع يستوعبها.